O xuíz afirma fronte ás críticas do Goberno que non hai lei que lle impida citar a Begoña Gómez en periodo electoral

 O xuíz Juan Carlos Peinado afirma nunha nova providencia que non hai "precepto algún" da Constitución ou da lei que "impida continuar o impulso de calquera instrución en curso", despois de que esta semana se coñecera a súa decisión de citar o 5 de xullo a Begoña Gómez, investigada  por delitos de tráfico de influencias e corrupción nos negocios.

O titular do Xulgado de Instrución número 41 de Madrid fai esta reflexión dous días despois de acordar a citación como investigada da muller do presidente do Goberno para o domingo 16 de xuño.

A decisión foi obxecto de polémica por adoptarse no medio da campaña para as eleccións europeas deste domingo. Desde o Goberno viuse con "estrañeza" pola "casualidade" de coñecer esta información "precisamente esta semana".

O maxistrado engade tamén que a xunta electoral non comunicou que ningunha das persoas citadas fose proclamada no proceso electoral vixente.

O xuíz Peinado tamén acordou tomar declaración como testemuña ao empresario Juan Carlos Barrabés, adxudicatario de varios contratos investigados na causa.

Nestes momentos está ingresado no Hospital 12 de Octubre.

O xuíz adopta esta decisión tras escoitar o perito que o examinou, e diríxese a este hospital para que informe de en que día comprendido entre o 17 e o 23 de xuño pode prestar declaración.