Abanca pecha con Crédit Mutual a compra de Targobank

Abanca e Banque Fédérative du Crédit Mutuel asinaron este venres en Madrid o peche da operación de compravenda de Targobank España. No acto de firma celebrado estiveron presentes o presidente e CEO de Abanca, Juan Carlos Escotet Rodríguez e Francisco Botas, respectivamente, e o CEO de BFCM, Alexandre Saada, segundo informou Abanca.

A compravenda produciuse unha vez foron recibidas as autorizacións administrativas do Banco Central Europeo, a Comisión Nacional dos Mercados e da Competencia, e a Dirección Xeral de Seguros e Fondos de Pensións. Péchase así o proceso iniciado en decembro de 2022 co comezo das negociacións en exclusiva entre Abanca e BFCM, conversacións que deron lugar ao acordo de compravenda subscrito en febreiro deste ano, polo que a entidade adquirida operará desde este momento baixo a marca Targobank Grupo Abanca.

A integración na plataforma tecnolóxica de Abanca proporcionará aos clientes de Targobank España beneficios como unhas maiores capacidades tecnolóxicas, especialmente a través da súa banca móbil, e atención persoal nunha ampla rede de preto de 700 oficinas en España, segundo a entidade. 

Coa integración de Targobank España, que achega 6.000 millóns de euros en volume de negocio, Abanca xestionará un total de 114.117 millóns de euros, unha cifra un 5,6% superior á actual.
Targobank España conta con 507 profesionais que prestan servizo a 161.000 clientes a través das 51 oficinas que ten en todo o territorio nacional, especialmente no arco mediterráneo, Madrid e Andalucía.