Deteñen en Vigo un home acusado de matar a muller en Valladolid

Deteñen en Vigo un home acusado de matar a muller en Valladolid.

O arrestado foi trasladado a dependencias policiais para tomarlle declaración.

Os bombeiros e a Policía Nacional atoparon este luns o corpo sen vida da muller, de 49 anos,  con signos de violencia no incendio da súa vivenda, no barrio de Pajarillos, en Valladolid. 

Este martes practicaráselle a autopsia ao corpo.

A Delegación do Goberno informou de que no domicilio tamén se atoparon tres cans mortos por inhalación de fume.

Dous veciños aseguraron aos medios de comunicación que a falecida vivía co seu marido -chamado Juan e ao que non viron desde o domingo. A parella non tiña fillos.

Rafa, un veciño que vive porta con porta coa vivenda, asegurou aos medios de comunicación que o agora detido tivera episodios moi violentos con algúns veciños, e chegou a esnaquizar unha porta doutro piso cunha machada.

Segundo o seu relato, ás 4 da mañá escoitou un golpe moi forte na súa casa e ás 8 empezaron a ver fume saíndo da xanela, polo que avisaron os bombeiros.

De confirmarse este caso como un asasinato machista, serían 29 as mulleres vítimas mortais da violencia de xénero no que vai de ano, 1.273 desde 2003.

As vítimas da violencia machista e a súa contorna poden pedir axuda en distintos recursos activos todos os días da semana e as 24 horas do día: o teléfono 016, o correo electrónico 016-online@igualdad.gob.es e a canle do WhatsApp no número 600 000 016.

Nunha situación de emerxencia pódese chamar ao 112 ou aos teléfonos de emerxencias da Policía Nacional (091) e da Garda Civil (062) e, se non é posible facer esa chamada, en caso de perigo existe tamén a opción de activar a aplicación ALERTCOPS, que envía un sinal de alerta á Policía con xeolocalización.