Atopan o cadáver dun home nun barranco preto da súa casa no Pino

Os Bombeiros de Arzúa rescataron o corpo sen vida dun home, que foi atopado nun barranco de difícil acceso preto do seu domicilio situado no lugar de Santa Irene, en Arca, no concello coruñés do Pino.

A Central de Emerxencias informa que o martes, pasadas as cinco e media da tarde, un particular contactou co 112 Galicia para solicitar axuda.

Na chamada, esta persoa indicaba que botaba en falta un veciño que vivía só e que non vía desde había dous días.

Ante a sospeita de que lle puidese ocorrer algo no interior da vivenda, contactou cos servizos de emerxencia.

Os xestores do 112 avisaron o Servizo de Urxencias Sanitarias de Galicia-061, os Bombeiros de Arzúa e a Garda Civil, que se desprazaron á vivenda e non atoparon o home nin no interior nin nos exteriores da mesma. Con todo, atoparon o coche estacionado no alpendre.

Así, tras seguir coa busca polos arredores, arredor das 21:00 horas, os axentes da Garda Civil comunicaron ao 112 Galicia o achado do corpo sen vida do home. Indicaron que fora localizado nun barranco de difícil acceso, pola parte de arriba do seu domicilio.

Foi necesaria a intervención dos bombeiros que, tras realizar as correspondentes dilixencias no mesmo lugar dos feitos por parte da Policía Xudicial, rescataron o corpo e procedeuse ao levantamento do cadáver.