Adela fai os cen anos cunha festa en familia na súa casa de Monforte

O nacemento dos seus catro fillos, dos catro netos e dos tres bisnetos foi o mellor que lle pasou na vida a María Adela. O peor foi a morte dun fillo e doutros seres amados. Ademais, hai dous momentos que lle quedaron moi marcados no corazón: a Guerra Civil e a pandemia da covid.

Traballou toda a vida na casa, e botou 73 anos casada co seu home, que morreu hai cinco. Entre os mellores momentos que compartiu con el están as vacacións que pasaban en Benidorm.
Agora pasa o tempo coa familia ou dando un pequeno paseo.

A casualidade quixo que este mesmo día tamén sexa o aniversario dunha das bisnetas. Tres anos dunha banda e cen da outra. Como agasallo, a familia de Adela xuntouse de sorpresa no baixo da súa casa para celebrar os aniversarios. A sorpresa e a emoción foron grandes.

O compromiso de Adela, esta nova centenaria, é recibirnos de novo no seu 101 aniversario.

Proporcionalmente, Galicia é a comunidade española con máis persoas centenarias, preto de 2.000, o 0,07 % da poboación.