Air Europa cancela a primeira conexión de Alvedro con Madrid este luns pola folga de pilotos

Air Europa cancelou 14 voos da súa programación prevista para este luns por unha nova folga que secundarán os seus pilotos ata o próximo día 2 de xuño, 

Entre eles está a primeira conexión da xornada entre Madrid e A Coruña, que lle afecta tanto ao voo de ida desde Baraxas das 6:40 horas, coma ao de regreso, previsto desde A Coruña ás 8:35 horas.

A compañía ofrécelles aos pasaxeiros afectados a posibilidade de cambiar de data ou de destino ou de obter un vale polo importe do billete, entre eles na Coruña e Vigo.

O Sindicato Español de Pilotos de Liñas Aéreas (Sepla) convocou as pilotos de Air Europa a oito novas xornadas de folga para os días 22, 23, 25, 26, 29 e 30 de maio e o 1 e 2 de xuño, tras as catro que levaron a cabo a principios deste mesmo mes e que se saldaron con 68 voos suprimidos.

Durante estas oito novas xornadas de protesta, os voos cancelados ascenden a 114 e aféctanlles ás rutas nacionais que enlazan Madrid con Bilbao, A Coruña, Palma de Mallorca, Vigo ou Málaga, e as internacionais a Roma (Fiumicino), Milán (Malpensa), París-Orly, O Porto ou Lisboa, ademais da que conecta Barcelona e Palma.

No aeroporto de Vigo a operatividade estará afectada o 25 de maio, coa cancelación da conexión con Madrid, coa ida prevista para as 8:40 horas e o voo de regreso para as 10:40 horas. Ao día seguinte a compañía prevé cancelar a mesma conexión, con saída de Madrid ás 10:40 horas e regreso a Vigo ás 12:35 horas.

A compañía prevé entre 12 e 18 cancelacións por día

Nas cinco primeiras xornadas de folga, así como na do 1 de xuño, a aeroliña deixará de operar 14 voos en cada unha delas, mentres que o día 30 de maio, haberá 18 operacións suprimidas. e o último, o 2 de xuño, un total de 12.

A compañía ofrece tres alternativas aos clientes afectados: a primeira é a posibilidade de cambiar de data na súa mesma cabina para voar nos 30 días posteriores ao do seu voo orixinal e na mesma ruta.  As outras dúas son cambiar de ruta a outro destino operado por Air Europa dentro dos 3 días anteriores ou posteriores á data orixinal do seu voo ou gardar o importe do billete para usalo como crédito nunha compra futura para calquera aeroporto operado pola aeroliña.

Motivos da folga para o Sepla

O Sepla asegura que a folga responde "á tensión e ao conflito laboral xerados polos directivos de Air Europa ao xogar cos dereitos dos traballadores, disfrazando como propostas o que supón unha perda real dos dereitos laborais adquiridos no IV convenio colectivo".

Os pilotos "séntense discriminados pola empresa, xa que é o único colectivo laboral afectado por este modo de actuar da aeroliña nas distintas negociacións que mantivo de revisións salariais".

Mentres se mantén o conflito cos pilotos, a negociación entre Air Europa e os sindicatos dos seus tripulantes de cabina de pasaxeiros (TCP) chegou a bo porto, ao alcanzarse o 18 de maio un preacordo de convenio, que recolle unha suba salarial acumulada en tres anos, entre 2023 e 2025, do 11,93 %, e que agora se someterá á ratificación dos traballadores.