Alerta amarela por temperaturas máximas en varias zonas de Ourense

Despois de tres xornadas de intensa calor en que se superaron amplamente os 40 graos, a cidade de Ourense recupera valores máis soportables.

No centro da cidade, ás dez desta mañá os termómetros rexistraban uns agradables 26 graos, cinco graos menos que o día anterior a esa mesma hora. 

"Ben tamén facía falta. Ultimamente estabamos indo ao río e á piscina porque estas tardes son insoportables".

"Ben vaise levando. Aquí en Ourense algo fatal, pero vaise levando non queda outra".

"Tamén xa nos chegou. A verdade que é horrible, sobre todo pola noite. Lévase fatal".

Se se cumpren as previsións, nas horas centrais do día a capital ourensá non superará os 36 graos, ao igual que ocorrerá na comarca de Valdeorras, a bacía ourensá do Miño e o sur da provincia.

"Din que vai baixar bastante, si. Vaise agradecer, creo que o vai agradecer todo o mundo".

Nas seguintes xornadas as temperaturas iranse achegando en toda Galicia a valores máis normais nesta época do ano.