Álvarez acusa a Rueda de utilizar o debate como "un carrusel de anuncios electorais"

O portavoz do PSdeG Luis Álvarez criticou na súa intervención no debate sobre o estado de autonomía a "nefasta xestión" do presidente da Xunta Alfonso Rueda e sinalou que o seu partido será o que poña "punto e final" a unha etapa "desmoralizadora" para Galicia.

Álvarez acusou a Rueda de utilizar o debate como "carrusel de anuncios electorais" no que o socialista considerou que foi o "primeiro mitin de campaña electoral". 

Este é o primeiro debate en que Álvarez participa como portavoz dos socialistas, e no seu discurso centrouse en condenar as políticas do Partido Popular e de Alfonso Rueda, do que dixo que "non está á altura" para liderar Galicia.

"Non sabemos se estamos a avaliar o traballo dun executivo que leva dous meses, un ano ou catorce. Vou decantarme polo último", expresou Álvarez, que engadiu que Rueda é "un fiel escudeiro de Feijóo" e que o fracaso de Feijóo co seu errado intento de investidura é tamén o fracaso de Rueda coa súa "nefasta xestión".

En materia económica criticou que o PPdeG retirase a Tarxeta Básica nun contexto marcado pola inflación, abandonando 55.000 familias, e que, con todo, logo bonificase os "millonarios galegos" co 50 % de imposto do patrimonio.

"Quita aos que menos teñen para perdoar impostos aos millonarios. É vostede Robin Hood pero ao revés", espetoulle Álvarez.

Tamén sinalou a "falta de política industrial", coa "perda de 40.000 postos de traballo na última década", a incapacidade de defender os intereses de Galicia na Unión Europea en materia de pesca e a inacción para resolver os conflitos entre bateeiros e percebeiros ou os que existen en relación ao sector eólico e o seu impacto social e ambiental.

No relacionado coa política social, condenou a medida "estrela" de "recuperar" un bono de coidados de 5.000 euros anuais, algo que suprimiran, posto que o Goberno do bipartito "xa o puxera en marcha".

Así mesmo, lembrou que Galicia é a comunidade autónoma con maior déficit de prazas en residencias de maiores en España, debido a que hai 2,8 prazas por cada cen persoas maiores.

Un dos temas en que máis incidiu foi a sanidade, condenando as políticas de "recortes" e as "privatizacións encubertas" e mais a "precariedade" dos profesionais sanitarios.

"Somos a terceira comunidade autónoma que menos inviste en atención primaria de toda España", afirmou Álvarez, que engadiu tamén que Galicia conta con "mil profesionais menos que en 2009" e que ten "récord" nas listas de espera.

En educación tamén advertiu de recortes e condenou a última proposta de acordo da Xunta, que "por fin" se decidiu a baixar os cocientes de alumnos, pero ironizou con que non se aplicarían ata o ano 2034.

O socialista pediu ademais que a Xunta recapacite "e volva ao sistema de préstamos de libros de texto que implicaba a gratuidade" e que abandone a política de "peche de escolas". "Son vostedes o maior exemplo de austericidio", declarou Álvarez.

Censurou tamén a carencia de servizos públicos e o abandono do rural, ademais do abandono de funcións en materia de vivenda ou en materia de igualdade.

En definitiva, abundou na idea de que o Goberno da Xunta liderado polo PPdeG está "falto de ideas" e non ten "un proxecto de país", nin en 14 anos reclamou "ningunha competencia nova".

Ante isto, pediu que se "sume" aos avances que o Partido Socialista impulsou desde o Goberno central e a propostas que "revitalicen" o país.