A autopsia confirma que Álvaro Prieto morreu electrocutado pola catenaria

A autopsia practicada ao cadáver de Álvaro Prieto, achado este luns entre dous vagóns dun tren na estación de Santa Justa en Sevilla, confirmou que o mozo cordobés desaparecido desde o pasado xoves morreu electrocutado.

A autopsia, realizada no Instituto de Medicina Legal (IML) de Sevilla, descartou que a morte do novo, ese mesmo xoves, se puidese producir por algún outro mecanismo, o que confirma os primeiros indicios apreciados tras o achado do corpo que apuntaban ao seu falecemento por electrocución.

As cámaras dunha gasolineira próxima á estación ferroviaria captaron a Álvaro Prieto subíndose ao teito dun tren, onde se tería electrocutado polo contacto coa catenaria, segundo confirmaron a fontes da Delegación do Goberno en Andalucía. Ditas fontes engadiron que se pode concluír que non houbo intervención de terceiras persoas.

O Tribunal Superior de Xustiza de Andalucía (TSXA) informou de que o Xulgado de Instrución número 11 de Sevilla, que leva a causa polo falecemento de Álvaro Prieto, recibiu este martes o adianto da autopsia practicada ao cadáver no Instituto de Medicina Legal, que indica que o mozo falecería por electrocución.

O cadáver foi localizado entre dous vagóns dun tren que levaba parado na área de mantemento da estación de Santa Justa desde o 24 de agosto e que se moveu este luns para propiciar a entrada doutro convoi.

O achado produciuse nunha zona que xa fora rastrexada polos corpos de seguridade que buscaban o mozo e que ía ser de novo batida este luns.

Álvaro Prieto, futbolista dos xuvenís do Córdoba C. F., desapareceu na mañá do xoves 12 cando pretendía tomar un tren para volver a Córdoba tras pasar unha noite de festa cuns amigos en Sevilla, un tren que non puido coller porque tiña o móbil sen batería e non tiña efectivo para comprar outro billete.

Sobre a investigación do ocorrido en Santa Justa, onde o mozo tentou meterse noutro tren que paraba en Córdoba, aínda que foi interceptado por persoal da estación, que llo impediu, o delegado do Goberno en Andalucía, Pedro Fernández, sinalou que "se lle ofreceu axuda", a que se lle dá a unha persoa que non ten o billete e "déuselle a oportunidade de cargar o móbil", aínda que o mozo non a aceptou.

En canto á tardanza en atopar o cadáver, o delegado explicou que a zona en que foi atopado o cadáver xa fora batida polos corpos de seguridade, aínda que foi onte no momento en que se moveu o tren cando se puido ver o corpo. 

A tráxica noticia da localización do corpo sen vida do mozo cordobés tamén causou unha profunda conmoción en Lugo. Álvaro Prieto é fillo dun matrimonio lucense, unha procuradora e un empresario, que acabaron asentándose en Córdoba por motivos laborais. O seu avó era un coñecido empresario da cidade, recentemente falecido, quen fundara unha empresa de transportes que agora xestiona un tío do mozo.  Familiares e achegados afrontan agora este novo golpe con pesar e consternación.