Ana Pontón: "O BNG vai dar un gran salto adiante nestas eleccións"

Eleccións municipais

"Levo durante as últimas semanas percorrendo o país, vendo o ambiente que hai e vendo como esa corrente de ilusión e simpatía arredor do BNG medra e medra. O mellor indicativo é que a xente responde ás convocatorias e desde a rúa nos anima a seguir cara a adiante".

"Teño unha convicción: o BNG vai dar un gran salto nestas eleccións. Imos presentar máis candidaturas e imos ter máis alcaldes e alcaldesas e máis concelleiros e concelleiras. Os gobernos locais do BNG son un exemplo de capacidade de transformación en positivo, de avance, de modernización do país. Vamos a por todas".

Sanidade pública

"O que vexo é un cansazo moi grande coas políticas do PP e a preocupación da xente co que está pasando coa sanidade pública. Nos gobernos do PP recortáronse 2.339 millóns de euros en Atención Primaria. O PP ten un obxectivo moi claro: recorta e deteriora a sanidade pública para beneficiar á privada. O que se publica sobre as listas de espera non é real. Hai milleiros de citas que están en caixóns e non se contabilizan nunca nas listas de espera. En sanidade a propaganda non vale. Todos pasamos polo sistema sanitario público e vemos o que hai".  

Lei de liberdade sexual

"Se a lei ten un problema, había que solucionar ese problema. Pero hai unha liña vermella e é que non se toque o consentimento: hai que poñer o consentimento no centro. Estamos vendo que algunhas das sentenzas se están revisando porque non eran firmes e hai un criterio da Fiscalía que non comparte a aplicación que se estaba facendo. O que me parece desprezable é que se queira utilizar este tema para facer 'carroñeirismo' político. Paréceme das cousas máis fortes que levo visto".

Transición enerxética

"Resúltame moi complicado poder valorar os anuncios que fai a Xunta, entre outras cousas porque cando lle preguntan ao presidente da Xunta se esa futura compañía (que de momento é só un titular) vai ser maioritariamente pública ou privada, non é capaz de aclarar ese extremo. O que estamos vendo é fume para intentar tapar a responsabilidade que ten o PP no espolio eólico deste país e na destrución do noso territorio".

"Nós dámoslle un si rotundo á enerxía eólica, pero non en calquera lugar. O que non pode ser é que as eléctricas estean por riba de todo. Que Naturgy, Endesa e Iberdrola queiran poñerse por diante da xente do mar. Iso é hipotecar o noso futuro".

Transferencia da AP-9

"Cómpre lembrar que nesta lexislatura se produciu unha rebaixa histórica das peaxes da AP-9, algo que nunca acontecera. Nós non tiramos a toalla para que se transfira a Galicia a xestión da AP-9, pero o PP e o PSOE non deixan de poñer paus nas rodas en Madrid á proposta. O noso proxecto é que a AP-9 que leva anos amortizada estea por fin libre de peaxes".