Aparece a boa que buscaban en Ferrol dende hai máis dunha semana

Apareceu en bo estado a boa que buscaban en Ferrol dende hai máis dunha semana. Os donos deron co réptil no piso en que viven, agochado detrás dunhas caixas de mudanza. 

A boa volverá agora á seguridade do seu terrario, e os veciños do edificio xa poden respirar tranquilos logo de días con medo a que o animal se metese nas súas casas.

O seu propietario é un militar que estaba en medio dunha mudanza porque lle confirmaran un novo destino. Segundo explicou, a vida do animal non correu perigo ningún porque comera antes de desaparecer e adoita alimentarse cada dúas semanas. O único salientable é que a súa temperatura estaba só un pouco máis fría do normal ao atoparse fóra do seu terrario.

Os veciños da rúa Galiano de Ferrol xa respiran tranquilos despois dunha semana de moita preocupación que os mantivo en alerta. A Policía Local de Ferrol xa realizara unha primeira inspección este pasado luns do baixo do edificio e dos demais pisos sen poder acceder á vivenda do militar por atoparse fóra da cidade por motivos persoais.

Ao final, as sospeitas foron certas e a boa constríctor albina de dous metros nunca marchara da vivenda, para tranquilidade dos veciños.