Aparece decapitada a escultura do centro cultural da Seca en Cambados
Os estragos no paseo do Esteiro de Tragove atribuídos a accións vandálicas son continuos
O espazo que rodea a Casa da Cultura de Corvillón, en Cambados, está cheo de pegadas de accións vandálicas atribuídas a individuos incontrolados que se mesturan coa xente moza que se xunta polas noites nesta zona.
Dos seus ruídos, molestias e estragos saben ben os residentes nesta zona de Tragove. O último foi a decapitación da escultura instalada no miradoiro ao esteiro da Seca, novo acto vandálico no equipamento dun espazo natural fermoso e de moita andaina.
"Quitarlle a cabeza á escultura non ten sentido, o mesmo que romper as cousas. Non ten sentido, porque o pagamos todos", afirma unha muller que ía polo paseo.
"Neste paseo tan extraordinario cunha zona húmida fantástica podías camiñar de noite e íanse acendendo as luces segundo camiñabas e... a patadas, estragáronas. Repuxéronas e outra vez están estragadas. E o da escultura? É que non teño palabras.....", sinala un home.
Barbaridade, acto incomprensible... son outras reaccións ante a desfeita dalgún descerebrado que deixou no sitio o proxectil empregado contra o patrimonio municipal.
"Que sentido ten quitarlle a cabeza á estatua?. Son delincuentes que andan soltos por aí e non se sabe quen son", di outro paseante.
A reparación desta obra artística da Escola de Canteiros de Pontevedra vai requirir levar toda a peza a un taller de cantería para a súa restauración.
