Investigan a morte dun home que faleceu tras botarse ao mar en Ribeira
Investigan a morte dun home que faleceu tras botarse ao mar en Ribeira
Tirárase nunha zona de pedras non acondicionada para o baño ao carón do peirao de Castiñeiras
Un home de 44 anos faleceu a primeira hora da tarde deste sábado en Ribeira, despois de tirarse ao mar e aparecer aboiando ao carón do peirao de Castiñeiras.
Segundo as testemuñas que estaban na praia no momento do suceso, o home chegou co seu coche ata o peirao. Deixou as cousas no vehículo e botouse ao mar el só, na zona do crebaondas, un lugar de pedras non acondicionado para o baño.
Un motorista acuático viu a vítima inconsciente sobre as catro da tarde preto do dique e tratou de asistilo. Coa axuda de máis bañistas sacárono da auga e fixéronlle reanimación cardiopulmonar pero a vítima xa non volveu en si.
Golpe na cabeza
O home, veciño da zona, presentaba un golpe na cabeza, probablemente producido na caída. O 112 mobilizou Urxencias Médicas, Protección Civil e a Policía Nacional, que investiga o caso.
Dúas horas despois de que aparecese o corpo, un coche fúnebre trasladábao ao hospital para lle practicar autopsia e determinar as causas da morte.
