Aparece en bo estado un home de 98 anos que levaba un día desaparecido en Verea
Aparece en bo estado un home de 98 anos que levaba un día desaparecido en Verea
O máis probable é que se despistase cando ía visitar un sobriño nunha aldea próxima
Foi trasladado en ambulancia a un centro médico para facerlle un recoñecemento
Apareceu vivo e en bo estado Eloy Alonso Rodríguez, un home de 98 anos que desde onte estaba desaparecido na aldea de Gondesende, no concello de Verea, na comarca ourensá de Celanova. Desde que onte á tarde notaron a súa falta un amplo dispositivo estivo na súa busca polos montes que rodean a aldea.
Foi a pista dun veciño a que axudou a localizar o home. A Garda Civil dirixiuse á zona que lle indicou, un camiño no monte, e alí apareceu vivo Eloy Alonso Rodríguez, de 98 anos. Levaba desaparecido desde onte ao mediodía, e segundo nos confirmou o alcalde de Verea, aparentemente estaba en bo estado. O máis probable é que se despistase no camiño cara á aldea do Cexo, a onde ía visitar o seu sobriño.
O home foi trasladado en ambulancia a un centro médico para facerlle un recoñecemento completo. Pasou unha noite fóra da casa no monte e toda a veciñanza e a súa familia estaba xa moi preocupada. Un amplo dispositivo de busca estivo rastrexando desde onte a zona, un lugar complicado e de moito monte.
Finalmente a busca deu resultado e a chamada a berros dun veciño axudou a localizar a Eloy Alonso, moi cerca da súa aldea de Gondesende.
