Aparecen dous cans supostamente abandonados na horta dunha casa en Lugo
Aparecen dous cans supostamente abandonados na horta dunha casa en Lugo
O máis novo dos animais estaba amarrado cunha corda a un couceiro
Tras seren trasladados ao albergue da protectora, o seu dono recuperounos
Aduciu que levaba pouco con eles, sen tempo a poñerlles o chip, e que escaparan
Dous cans cruzados coa raza setter foron localizados na horta dunha vivenda na parroquia de Orbazai, en Lugo. Non tiñan o microchip identificativo e un deles estaba atado a un couceiro, polo que consideraron que foran abandonados.
Luis Real, dono da casa: "O que máis me estrañou é que estaban atados cunha corda de saltaren os pequenos. O máis novo non sei como non afogou, e o grande, ao estar a cadeliña presa, non marchaba".
Unha vez se decataron do acontecido, os veciños alertaron a Policía Local. Á súa vez, os axentes déronlle aviso a un laceiro, que levou os animais ao albergue da protectora.
A sorpresa saltou cando se presentou o dono dos cans aducindo que levaba pouco tempo con eles, que escaparan e que se enredaran coa corda dunha rapaza, unha versión que lle resulta verosímil ao veterinario que os revisou.
Diego Álvarez Abuín, dono dos cans: "Había pouco que os tiñamos, que nolos dera un cazador, xa falaramos cun veterinario para pórlles o chip, como puideron corroborar na Protectora, e tivemos a mala sorte de que escaparon".
Alberto Losada, presidente da Protectora de Animais de Lugo: "Danse casos de que cando non cazan, os abandonan, nalgún caso mesmo quitándolle o microchip. Entendo que, cando se ven cans de caza fóra do deu sitio, a xente pense mal".
Finalmente, Zeus e Cuca, que é como se chaman os cans, puideron volver para o seu novo fogar.
