Cautela dos donos de mascotas ante a alerta por cebos envelenados en Pontevedra

O paseo da Ría é un dos puntos en que, supostamente, apareceron restos de comida que agochaban veleno. Mesmo falan de que eses cebos ocasionaron a morte a catro cans desde hai un ano.

Bea afirma ser testemuña de tres deses casos nas Corvaceiras: "Alí si que morreron xa tres cans. E falando no supermercado, porque eu alí xa non o deixo ir nunca; o da miña veciña, Bali, morreu envelenado. Ademais era un veleno que non lle deu tempo a trasladalo. Ía camiño de Santiago e o can xa morreu, sen tempo a salvalo".

O mesmo que Luis, quen pasea coa mascota, anda vixiante ante o temor de que o animal coma o que non debe: "Ando con ela presa, porque ten tendencia a comer todo o que ve".

Di que nos seus paseos non encontrou nada sospeitoso, como tamén din Carmen e Juan. "Non se me deu o caso de velos, pero paréceme que é unha atrocidade. Obra de xente sen escrúpulos, sen alma e sen....", afirma Juan.

E Carmen conta: "Eu non encontrei. Teño coñecidos que si, que ao can lle pasou algo, pero que o colleron a tempo e salvouse".

Nin Policía Nacional nin a Local recibiron denuncias sobre algún achado no espazo público de Pontevedra de alimentos envelenados cos cans como obxectivo.