Catro fitos dun tramo do Camiño Primitivo aparecen tirados en Castroverde

Nun tramo de tres quilómetros do Camiño Primitivo apareceron tirados catro dos fitos que indican o itinerario. Sucedeu en Castroverde, entre os lugares de San Miguel do Camiño e Souto de Torres. Deron a voz de alarma uns peregrinos que percorrían esta ruta xacobea.

"Soubémolo a través dos peregrinos, e a min mandáronme fotos. Eu considero que partir da Penalonga foron para atrás, tiraron dous, e logo foron para adiante e imaxino que tiraron outros dous", di Manuel Muñiz, presidente de Amigos do Patrimonio de Castroverde.

A base das pedras está soterrada de forma que non caian soas, o que fai pensar que se trata dun acto vandálico feito a conciencia, posiblemente por varias persoas. Tampouco se desbota que se empregasen ferramentas, e incluso un vehículo, para poder derrubar os fitos.

"No Camiño había tempo que non se vía isto. Pode aparecer un tirado por causa dunha máquina, pero isto vese que foi a mantenta. Cunha persoa ou dúas como mínimo, porque están un pouco enterrados", explica Muñiz.

No mesmo Camiño Primitivo ao seu paso por Castroverde, moi preto do tramo afectado, este mesmo ano o cemiterio de Soutomerille tamén fora obxecto de actos vandálicos.