Arden dous coches de madrugada no barrio coruñés de Monelos

A explosión e o ruído das lapas calcinando un vehículo na rúa, sacou da cama os veciños de Monelos.

"Escoitamos como unha bomba, nos asomamos á fiestra e xa vimos que ardía un coche"; "Despois aínda houbo máis explosións, seguro que foron as rodas";"Puxen un pantalón, baixei e alucinei", din os veciños.

A peor parte levouna Lara, a propietaria do vehículo.

"Eran máis das doce, estaba vendo unha peli de terror e collín asustada o teléfono. Era a policía para avisar que o meu coche, un Kia, estaba ardendo", di Lara.

Nin ela nin a súa nai se explican que puido suceder.

"Un coche de catro meses, de gasolina, aparcado desde hai máis dun día, co motor frío, eu creo que non arde só", di a nai de Lara.

"Xa me preguntaron se tiña inimigos, ou algún problema no pasado ou no traballo, pero non, de verdade que non, para nada", engade a propietaria.

Pouco tempo despois de extinguir o lume, os bombeiros tiveron que regresar á zona. Outro coche ardía na avenida das Margaridas, pero a Policía Local logrou apagalo a tempo. A proximidade na hora e no lugar dos dous incendios resúltalles sospeitosa.

"Ao pouco ían cara á rúa do lado a atender a outro coche, ten todas as papeletas de ser intencionado", sospeita Lara.

"Había moita policía, alguén dixo que atoparan un obxecto debaixo, pero nin idea, xa nos dirán", di a nai.

Por sorte, non houbo danos físicos e as lapas non se estenderon aos coches que había na zona. Agardan que pronto se esclareza o sucedido, e que este tipo de cousas só volvan pasar nas películas de terror.