Catro vivendas afectadas por un incendio nunha aldea de Parada do Sil

Foi contra o mediodía cando os veciños da aldea de Requián se decataron de que saía fume dunha vivenda. O seu propietario marchara a primeira hora da mañá á vendima.

Ata o lugar trasladáronse os bombeiros de Maceda que contaron co apoio do GES de Castro Caldelas, do servizo de extinción de incendios forestais da Xunta e de efectivos de Protección Civil.

A pesar da súa actuación, as lapas calcinaron por completo a casa e estendéronse a outras tres lindeiras, dúas delas segundas residencias aínda que unha estaba ocupada.

O concello ofreceuse a realoxar os veciños que non poderán, polo momento, volver ás súas vivendas pero, en principio, optaron por quedar con familiares. A Garda Civil investiga o acontecido. Polo momento, descoñécense as causas do lume.