As Cíes recuperan as cifras de turismo anteriores á pandemia

Todos os días este verán, agás dous en agosto, as Illas Cíes completaron a súa capacidade de 1.800 persoas por día. 

A campaña das viaxes diarias ao parque nacional remata o vindeiro xoves 15 de setembro. Pero esta é a derradeira fin de semana na que particulares sen guía poden coñecelo.

Co verán tocando á súa fin e con menos turistas de vacación no sur de Galicia, as ringleiras de xente no peirao eran idénticas ás de xullo e agosto.  

Á espera do reconto final do ano, as estimacións falan de 300.000 visitas, cun agosto con cifras similares ás de 2019. O mes pasado achegáronse as Cíes máis de 64.000 persoas.

Este verán, os permisos de fondeo de embarcacións tamén se esgotaron a diario así como os grupos organizados con guías turísticos.