As candorcas entran na ría de Arousa e asoman pola de ría de Vigo
As candorcas entran na ría de Arousa e asoman pola de ría de Vigo
Esta fin de semana víronse preto da Illa de Sálvora, preto do Grove e tamén nas proximidades de Ons
Este luns xa se deixaron ver na ría de Vigo
Esta fin de semana un grupo de candorcas deixou sen temón un veleiro francés que pasaba entre Sálvora e O Grove e que foi remolcado a Ribeira. Outra embarcación, de bandeira inglesa, conseguiu chegar ao porto de Sanxenxo antes de sufrir danos. Aínda que non é habitual, ás veces as candorcas entran na ría da Arousa na busca de alimento, aproveitando a súa profundidade.
Este luns un grupo de ata 5 candorcas foron vistas entre as Estelas e as Cíes, á entrada da ría de Vigo.
"Tivemos un avistamento antonte entre a illa de Ons e a de Sálvora. Houbo unha interacción e provocaron danos nunha embarcación a vela que se remolcou a Ribeira. E onte pola mañá dous exemplares dese grupo entraron no canal de augas máis profundas cara ao interior da ría de Arousa", di Bruno Díaz, biólogo director do Instituto para o Estudo dos Golfiños Mulares (BDRI).
"Ás veces no verán entran na rías, particularmente no canal da Ría de Arousa, que é un canal de augas bastante profundas, supera os 50 metros, ata a illa Rúa. Por que? Seguen os peixes de tipo peláxico, ás veces os atúns entran dentro e outros peixes de gran dimensión que poden interesarlle a unha candorca para a súa alimentación", di Díaz, director do BDRI.
A ferramente Orcinus, clave para o seu seguimento
Están a facer o seguimento das candorcas coa aplicación Orcinus, que desenvolveron co apoio da Xunta e Portos de Galicia, e onde se observa un movemento de ida e volta dende Xibraltar ás costas galegas, que adoita ser máis frecuente no verán. As candorcas non adoitan entrar nas rías, agás na de Arousa, pola profundidade que ten.
Precisamente a aplicación Orcinus naceu para avisar os navegantes da presenza de candorcas. De feito estes días están a rexistrar entre 4.000 e 5.000 visitas diarias á aplicación Orcinus.
Díaz apuntou que, aínda que normalmente quedan detrás das illas, na canle profunda, onde hai moitos peixes, "é posible" que algúns membros dispérsense, esculquen e acaben accedendo ao interior da ría.
