As farmacias de Pontevedra, aliadas na loita contra o mosquito tigre
As farmacias de Pontevedra, aliadas na loita contra o mosquito tigre
Os locais participarán nunha rede de alerta para avaliar o aumento de picaduras e determinar se son deste insecto, posible transmisor de enfermidades
Ademais trasladaranse recomendación á cidadanía e fomentarase o uso da app Mosquito Alert
![Imaxe de arquivo dun mosquito tigre](https://img-g24-crtvg.flumotion.com/prog24/2023/20230904/mosquito-tigre-2(1).png)
As farmacias de Pontevedra formarán parte dunha rede de alerta temperá que permitirá coñecer os posibles incrementos significativos de picaduras de insectos e avaliar se son de mosquito tigre.
É a principal acción da campaña que a Consellería de Sanidade e o Colexio de Farmacéuticos de Pontevedra presentaron este venres na cidade.
Con esta campaña, ambas as partes destacan a importancia que ten a colaboración cidadá para o control deste vector de enfermidades como os virus do dengue, chikungunya ou zika.
Mediante esta iniciativa trasladaranse á cidadanía as recomendacións para non contribuír á proliferación do mosquito tigre, evitar a súa picadura e fomentar o uso da app Mosquito Alert.
Esta aplicación permite enviar fotografías de mosquitos detectados, posibles lugares de cría e mesmo picaduras de mosquito para que sexan validadas por expertos do Consello Superior de Investigacións Científicas e da Rede Galega de Vixiancia de Vectores.
O ano pasado reportouse a presenza do mosquito tigre nos concellos de Moaña, Vigo, Cangas, Redondela e Vilaboa.
A vixilancia establecida pola rede abarca este ano máis concellos da contorna co fin de estudar a posible expansión do mosquito tigre.
No que vai de ano 2024, só foi detectada a presenza deste insecto, a través da aplicación Mosquito Alert, en Moaña e en Vigo, mentres que no trampeo da rede só se detectou nas mostras recibidas do concello de Moaña.