As matemáticas acosan o 'decano' da Liga, o Lugo

As matemáticas acosan o 'decano' da Liga SmartBank, o Lugo, cada vez máis preto do descenso a Primeira Federación.

Con 27 puntos en 36 partidos e 15 encontros consecutivos sen gañar (todos os de 2023), o equipo que máis tempadas consecutivas leva en Segunda División podería consumar o seu descenso matemático a próxima fin de semana.

Os brancos e vermellos contan cunha desvantaxe de 14 puntos respecto ás posicións de permanencia que marca o Racing de Santander e quedan 18 por disputar. O vindeiro domingo recibirán outro dos equipos que están en descenso, o Málaga, no Anxo Carro e unha derrota ou un empate deixarían a súa permanencia en mans do que faga o conxunto cántabro, ao que lle teñen gañada a diferenza de goles, horas máis tarde ante o Granada.

O Lugo leva ininterrompidamente na categoría de prata desde 2012 (once tempadas) e este curso recolleu a testemuña do Alcorcón como decano de Segunda División, un título honorífico que está a piques de perder. Aínda que a calculadora aínda lle dá opcións de salvarse, estas son mínimas xa que, como máximo, pode chegar a 45 puntos e o Racing leva 41.