ASAJA: "O presidente do Goberno aínda non deu a cara co sector agrario"

O secretario de Organización de ASAJA (Asociación Agraria Jóvenes Agricultores), Juan José Álvarez, di que bota en falta maior implicación de todo o Goberno na busca de solucións para o sector agrario español.

Nunha entrevista no Galicia por diante fin de semana da Radio Galega, Álvarez asegura que non é un problema que só se circunscriba ao Ministerio de Agricultura senón que "é un problema de todo o Goberno e ten que implicarse tamén o presidente do Goberno". 

"É curioso que presidentes de gobernos doutros países están implicados e apoiando o campo e este presidente do Goberno aínda non deu a cara co sector agrario".

Álvarez recoñece "un pequeno avance" nas conversas mantidas co ministro de Agricultura, o único co que ata o de agora tiveron interlocución segundo aseguran. Insisten en que seguirán coas protestas "ata que haxa solucións concretas". 

De cara á reunión este luns dos ministros de Agricultura da Unión Europea, Álvarez di que agarda que sexan "eficientes nesta ocasión" e "simplifiquen os trámites burocráticos" porque asegura que ese "papelame" está esganando ao campo europeo e español.