Atropela un garda civil nun control, escapa e cando o deteñen dá positivo en alcol e drogas
Atropela un garda civil nun control, escapa e cando o deteñen dá positivo en alcol e drogas
O axente quedou inconsciente na estrada e ingresou grave no hospital da Coruña, onde se recupera
O condutor quedou libre con medidas cautelares tras pasar a disposición xudicial
Imaxe de arquivo dun control
Un axente da Garda Civil do Sector de Tráfico de Galicia resultou ferido de gravidade na madrugada deste domingo tras ser atropelado por un turismo nun control. O condutor deuse á fuga, pero foi localizado e detido.
Os feitos sucederon durante un punto de verificación de alcolemia na N-VI, en Bergondo. O axente deulle o alto a un coche que, conforme a investigación, reduciu a marcha e semellaba que ía frear, pero cando o garda civil se aproximaba acelerou de xeito brusco e atropelouno. Os seus compañeiros non puideron facer nada para evitalo. O condutor fuxiu do lugar pero outras patrullas localizárono nunha das rúas do polígono industrial de Bergondo.
Fixéronlle probas de alcol e drogas e resultaron positivas as dúas. En alcolemia deu unha taxa moi elevada e na da droga, positivo en cocaína.
O axente quedou tendido na estrada inconsciente e con diversas fracturas. Unha ambulancia trasladouno ao hospital da Coruña, onde ingresou con prognóstico reservado.
Liberdade para o condutor
O autor do atropelo pasou a disposición xudicial en Betanzos imputado por catro delitos, dous contra a seguridade viaria, outro por abandono do lugar e outro de lesións por imprudencia grave.
O xuíz deixouno libre con medidas cautelares e terá que ir ao xulgado de xeito periódico. O vehículo presentaba danos compatibles co atropelo.
