Aumentan ás posibilidades de captura de bacallau en Terranova para os barcos galegos tras 32 anos de moratoria

Os barcos galegos elevan as súas posibilidades de captura de bacallau en augas de Terranova para o 2025, grazas ao acordo acadado na 46ª reunión anual da Organización de Pesqueiras do Atlántico Norte (NAFO). Este autorizou a pesca de bacallau na división 3L, que se corresponde coa porción norte en augas internacionais dos Grandes Bancos de Terranova, tras 32 anos de moratoria e confirmarse o seu proceso de recuperación.

En concreto, a NAFO, onde participou o director xeral de Pesca Sostible, Ramón de la Figuera, estableceu para esta zona un Total Admisible de Capturas (TAC) de 947 toneladas de bacallau para o conxunto dos países pertencentes a esta organización para 2025. Desta cantidade, 735 toneladas correspóndenlle á Unión Europea e, delas, unhas 160 toneladas á frota española, onde a maioría dos barcos son galegos.

Respecto ás pesqueiras de interese para a frota española, aumentáronse para o próximo ano as posibilidades de bacallau na zona 3M, correspondente á meseta submarina de Flemish Cap, ata as 12.613 toneladas.

Así mesmo, mantéñense as posibilidades de pesca de anos anteriores para a raia e bertorella, mentres que as capturas de fletán negro terán unha lixeira diminución do 2,4%, en aplicación da nova regra de explotación aprobada nesta reunión.

Durante este encontro, que tivo lugar en Halifax (Canadá), o Comité Permanente de Control e Cumprimento corroborou o bo cumprimento das medidas establecidas pola NAFO por parte das diferentes frotas.

Tamén se aprobaron melloras operacionais das iniciativas que se atopan en vigor, moitas delas a proposta da Unión Europea tras ser discutidas e acordadas entre os Estados membros interesados.

Ademais, analizáronse e aprobáronse as recomendacións dos grupos de traballo que reúnen a científicos, administracións pesqueiras, sector implicado e representantes de Organizacións Non Gobernamentais, en relación co enfoque ecosistémico en xestión de pesqueiras.