Betanzos prohibe consumir auga da billa tras confirmar a presenza dun novo virus

O Concello de Betanzos volveu decretar este sábado restricións no consumo de auga tras confirmar unha vez máis a presenza dun virus, como o que provocou en maio un gromo de 500 casos de gastroenterites e mantivo a prohibición durante un mes.

Segundo as mostras tomadas o xoves pasado, o virus está na auga de Betanzos, municipio de 13.000 habitantes, polo que só está permitido usala para a hixiene persoal e para labores domésticos de limpeza.

O Concello asegura que con esta medida se evita un novo gromo de gastroenterite, pois desde o xoves, cando se pediu evitar o consumo aínda que non se prohibiu, non hai casos "por riba dos habituais".

Unha vez máis actívase a subministración alternativa de auga con cisternas en varios puntos do municipio e coa repartición de auga a través de garrafas a maiores de 75 anos que viven sós, así como a persoas con problemas de mobilidade ou familias vulnerables.

A próxima reunión será o mércores da semana que vén para analizar a situación e decidir se se levanta a actual restrición, relata o consistorio nun comunicado.

Gromo de gastroenterite

O gromo de gastroenterite anterior empezou o 28 de maio, cando o Concello tivo coñecemento de que se detectaron 60 casos no centro de saúde de Betanzos.

Aínda que inicialmente se buscou unha bacteria que non apareceu e non se detectou o virus causante da enfermidade na auga ata varios días máis tarde, o Concello decidiu restrinxir a inxestión de auga.

O gromo rozou os 500 casos e o virus apareceu mesmo nunha fonte dun manancial, sen conexión coa rede.

O concello de Betanzos volve ter limitado o uso da auga da billa.

"Para lavar os cacharros vale, para ducharnos tamén, pero para facer a comida e lavar a boca ten que ser auga da garrafa", explica unha veciña.

O concello xa recomendara o xoves que non se consumise auga porque a empresa concesionaria do abastecemento detectara unha concentración de noravirus no río Mendo e no depósito de cabeceira do servizo.

Como os laboratorios da Universidade de Santiago non a observaron, volvéronse tomar mostras e este sábado confirmouse que, en efecto, a auga non é apta para o consumo.

"Para min que non se arranxou de todo a vez anterior", considera unha residente.

"Terán que ir á base do problema", reclama outra veciña.

A alcaldesa pediulle a Augas de Galicia que inspeccione o río á busca das posibles verteduras causantes.