Buscan un condutor que circulou en dirección contraria pola AP-9 en Ferrol
Buscan un condutor que circulou en dirección contraria pola AP-9 en Ferrol
Percorreu polo menos un quilómetro desde a rotonda do barrio naronés de Freixeiro
Varios corpos de seguridade manteñen aberto un operativo para localizar un condutor que circulou este sábado co seu turismo en dirección contraria no tramo da AP-9 que une os municipios de Narón e Ferrol.
O incidente rexistrouse pasadas as 9:30 horas, cando o 112 Galicia recibiu chamadas de alerta de varias persoas, á altura do quilométrico 34, no ramal de entrada á cidade ferrolá da Autoestrada do Atlántico.
Tras percorrer polo menos un quilómetro desde a rotonda do barrio naronés de Freixeiro, o condutor abandonou a vía, xa no municipio de Ferrol, pero os corpos de seguridade non concretaron en que punto.
O suceso, que se saldou sen danos persoais ou materiais noutros vehículos, obrigou a Policía Local de Narón a acudir á zona para controlar a circulación e velar pola seguridade do resto de turismos.
