Cae unha pedra duns quince quilos dunha fachada do centro da Coruña

"Eu estaba traballando e escoitei un ruído moi forte. Mirei e xa vin a toda a xente correndo...".

Foi o forte estrondo que fixo unha pedra, duns quince quilos, ao caer desde a cornixa dun inmoble da céntrica rúa Compostela, a carón da praza de Lugo. "Eran as nove menos cuarto e esta zona estaba ateigada de xente. Foi un milagre que non lle dese a ninguén". 

A zona segue acordoada e, esta mañá, eran moitos os que se detiñan diante da fachada pensando no que puido pasar.

Tres patrullas da Policía Local desprazáronse á zona. Tamén os bombeiros para sanear a fachada e asegurarse de que non había máis partes dela con risco de desprendemento.

Agora investíganse as causas polas que puido caer a pedra de grandes dimensións do edificio, un dos máis modernos desa rúa peonil.