Campaña de Tráfico desde este luns contra o exceso de velocidade nas estradas galegas

A Dirección Xeral de Tráfico (DXT) inicia este luns en Galicia unha campaña de control da velocidade centrada nas vías convencionais e as zonas urbanas co obxectivo de reducir os excesos que supoñen sete de cada dez sancións impostas en estradas galegas.

A campaña para reducir a velocidade media nas estradas que dispoñen dun só carril en cada sentido e tamén nas vías urbanas manterase ata o domingo 23 e contará co apoio das respectivas policías locais.

Os controis velarán polo cumprimento dos límites xenéricos e específicos de velocidade, e tamén en adiantamento, tras a entrada en vigor en marzo de 2022 da norma que impide aos condutores pasaren a velocidade en 20 quilómetros por hora para adiantar en vías convencionais, e as distancias entre vehículos.

Reforzaranse os controis naqueles treitos máis perigosos das estradas convencionais onde se produce o maior número de accidentes e de falecidos coa velocidade como factor concorrente.

Búscase así concienciar os condutores da estreita relación entre unha velocidade inadecuada e os accidentes, xa que no 22 % dos accidentes mortais rexistrados en 2019 apreciouse a velocidade como factor concorrente.

Durante a campaña que se desenvolveu en xullo de 2022, 202.411 vehículos foron controlados e 14.144 condutores, o 7 %, resultaron denunciados por exceso de velocidade.

O ano 2021 superáronse en Galicia as 378.798 sancións por velocidade inadecuada, o cal supón sete de cada dez infraccións que se cometeron na estrada nese ano. Delas, 220.677 foron detectadas por radares fixos e 158.121 por radares móbiles. O total de sancións rexistradas en Galicia foi de 509.294.