Casa da Fonte, unha gandería sostible que aposta pola autosuficiencia
Casa da Fonte, unha gandería sostible que aposta pola autosuficiencia
Alimentan o gando con pasto e forraxe propia para evitar a dependencia do exterior
Fan venda directa da súa marca ecolóxica de leite, queixo e iogures
Xosé foi o primeiro gandeiro en usar unha muxidoira portátil en Galicia. Para aforrar tempo, é el o que se despraza a muxir ata os pastos nos que viven e pacen as súas vacas.
"Producimos en base a pastos e as forraxes que nos recollemos, usamos os recursos nosos e da zona para non depender de insumos externos", explica o gandeiro.
Non depende de pensos nin cereais, e tampouco das condicións que impoñen as industrias lácteas. Xosé pechou o ciclo e creou a súa propia marca de leite, queixos e iogures ecolóxicos. El mesmo os distribúe en pequenos establecementos da contorna.
"Vendemos directamente o que producimos. Dá máis traballo e outro tipo de dores de cabeza pero non dependemos de intermediarios", di Xosé, de Casa da Fonte.
Comezou só e agora conta con cinco traballadores. Un modelo de produción rendible e respectuoso co medio, que ademais rexenera e mantén limpos os terreos da parroquia de Mañente, no concello de Pantón.
