Chega a Compostela o peregrino número 200.000 de 2023
Chega a Compostela o peregrino número 200.000 de 2023
É o segundo ano consecutivo que se logra esta cifra antes do 25 de xullo
Este mércores chegou a Santiago de Compostela o peregrino número 200.000, unha cifra que por segundo ano consecutivo se alcanza antes da celebración do Día do Apóstolo, o próximo 25 de xullo.
Segundo os datos que este mércores ofreceu a Fundación Catedral a Turismo de Galicia, neste 2023 hai un incremento do 14 % no número de peregrinos respecto a 2022.
Destaca o incremento de peregrinos internacionais procedentes de Corea, Estados Unidos e Australia.
Estes datos foron analizados este mércores polo novo director de Turismo de Galicia Xosé Merelles e o director da Fundación Catedral Daniel Lorenzo, que se reuniron para coñecer de primeira man o funcionamento da Oficina de Acollida ao Peregrino.
Xosé Merelles destacou a importancia deste recinto, onde día tras día centos de persoas recollen a Compostela que certifica a realización do Camiño para os que completan máis de 100 quilómetros a pé ou máis de 200 en bicicleta ou a cabalo.
A Oficina proporciona servizos de atención, información turística e cultural e é un espazo de encontro para os que completan a peregrinación.
