A China levanta o embargo á carne de tenreira española

O ministro de Asuntos Exteriores, José Manuel Albares, anunciou este domingo que A China vai levantar o embargo sobre a carne de tenreira española, que poderá así acceder libremente ao mercado chinés.

Albares fixo este anuncio nunha conferencia de prensa xunto ao seu homólogo chinés, Wang Yi, quen viaxou este domingo a Córdoba no marco dunha visita de traballo.

Para o titular de Exteriores este anuncio vai ter "un impacto tremendamente positivo" porque "é difícil atopar un mercado do tamaño do chinés" e, "coa calidade dos nosos produtos cárnicos" neste mercado "o éxito vai estar garantido".

Tras unha primeira reunión de traballo, Albares detallou que expuxo a vontade de España de establecer uns intercambios comerciais "máis equilibrados" entre ambos os países.

Yi, pola súa parte, asegurou que, ademais da carne, o mercado chinés abrirase tamén para sectores como o dos cosméticos ou o das compras públicas.

Planas valora o traballo de España coa China

O ministro de Agricultura, Pesca e Alimentación, Luis Planas, valorou o traballo desenvolvido polo Goberno central coa China para conseguir que ese país levante o embargo á carne de tenreira procedente de España.

Na rede social X (antiga Twitter), o ministro incidiu en que as negociacións do Executivo español con China "dan os seus froitos".

Trátase dunha "boa noticia" para o sector do vacún español porque a carne de tenreira "accede a un gran mercado como o chinés".