Cinco menores detidos pola policía tras unha presunta agresión sexual a unha adolescente en Málaga

Cinco menores foron detidos pola Policía Nacional en Málaga pola agresión sexual sufrida por unha adolescente nun descampado e unha vivenda da capital malagueña. Os arrestos leváronse a cabo o pasado 10 de outubro, por mor da investigación policial en relación a uns feitos ocorridos a noite do 22 ao 23 de setembro, segundo informou este luns a policía.

A vítima denunciou que acudiu a un descampado da cidade onde se celebraba o aniversario dunha amiga ao que asistiron numerosos mozos do instituto ou coñecidos destes, algúns maiores de idade, segundo adianta Diario Sur.

Segundo a denunciante, alí tomou unha copa que lle ofreceu un dos asistentes e comezou a sentirse mareada, ata o punto de que chegou a sospeitar que lle deran algún tipo de substancia na bebida, extremo que aínda non foi comprobado nas análises.

A menor relatou aos axentes que, entón, empezou a sufrir tocamentos de carácter sexual por parte de varios mozos que estaban na festa. Tras o encontro no descampado, unha parte do grupo desprazouse á casa onde vive un dos mozos, onde a moza manifestou que tiña lagoas sobre o que sucedeu, aínda que lembraba verse coa roupa baixada e rodeada por tres mozos espidos, sinala o xornal.

A moza marchou de alí para volver ao seu domicilio e, segundo o seu testemuño, dous mozos que supostamente ían acompañala á casa levárona a unha zona apartada e presuntamente a agrediron sexualmente entre dous coches. Ao día seguinte, a menor contou o ocorrido a un familiar, que a levou ao Hospital Materno Infantil de Málaga, que activou o protocolo ante casos sospeitosos de agresión sexual, o cal motivou a apertura dunha investigación policial.

As xestións da policía conduciron o pasado 10 de outubro á detención de cinco adolescentes, que pasaron ao dispor da Fiscalía de Menores. Sobre un deles decretouse o internamento nun centro de menores mentres que o resto quedou en liberdade vixiada á espera de ver como avanza a investigación.