Comeza a funcionar un novo radar de tramo na estrada que une Tui con Gondomar
Controla a velocidade, marcada a 60 km/h, nun treito de dous quilómetros nos dous sentidos
Os radares están situados no quilómetro 4,3 e no 6,3 partindo desde Tui
É o segundo radar de tramo de toda a provincia de Pontevedra, onde están activos 53 cinemómetros
Un treito en pendente, con presenza de animais na contorna e varias curvas perigosas. É o punto escollido pola DXT para instalar o segundo radar de tramo da provincia de Pontevedra. Un trazado atractivo para motoristas temerarios e no que morreron varias persoas.
"Aí xa se mataron varios rapaces do lugar, que ían en moto", sinala un veciño. "Non sei se co radar controlarán moito as motos, porque sempre poden dar volta antes de rematar o tramo", apunta outro veciño.
Os dispositivos están situados nas dúas marxes da estrada, entre os quilómetros catro e seis, partindo desde Tui. Entraron xa en funcionamento e por agora só controlan a velocidade, que nesa zona está limitada á 60 quilómetros por hora.
Ao pouco de ser instalado, xa lle escacharon os vidros das cámaras. Un xeito pouco amigable de acoller a súa posta en marcha, aínda que a veciñanza da zona celebra que se controle a velocidade neste treito.
"Facía falta, si, pero se cadra incluso antes do treito en que está o radar, porque por aquí os coches non respectan moito os límites", opina un veciño. "Hai moitas bicicletas e iso hai que controlalo", di outro veciño.
53 radares están activos na provincia. Un terceiro control de tramo está previsto na saída do túnel de Candeán na AP-9 sentido Tui, pero non hai data por agora para a súa activación.
