Comezou a segunda fase das obras na rúa San Andrés da Coruña
Comezou a segunda fase das obras na rúa San Andrés da Coruña
Foi hoxe un día complicado para a mobilidade na Coruña polo corte á circulación dunha das principais vías do centro, a rúa San Andrés
As obras van durar 12 meses
Despois dos traballos topográficos comenzan as obras de reurbanización da rúa de Santo Andrés. Primeiro día en que se corta esta arteria. Entre Santa Catalina e Sol péchase totalmente o tráfico rodado en ambos sentidos. Só se poderá acceder aos garaxes e os peóns só poden circular pola beirarrúa. Delimitaranse espazos para a carga e descarga nas rúas próximas.
Obras que van durar varios meses e o fin é humanizala cunha plantación de 80 moreiras, como as que había hai máis dun século dinamizando as tendas e establecementos de San Andrés.
O paseo marítimo e a avenida do Porto son as alternativas para os vehículos que antes circulaban por San Andrés.
A reordenación de tráfico afecta non só aos vehículos particulares, tamén obriga a cambios nos percorridos dos autobuses.
As obras van para moitos meses e cómpre aprender as novas rutas e alternativas. Para algúns toca armarse de paciencia. "Eu vivo na Torre e xa nos están pechando en Montealto, dentro de pouco imos ter que comprar unhas pateiras para poder entrar en barco por detrás da Torre". "A Coruña é unha península, isto é moi estreito e vai ser unha loucura".
O proxecto é transformar San Andrés nun bulevar incrementando o espazo para peóns, cun carril por dirección e sen prazas de estacionamento. "Ao principio vai ser complicado coma pasou nas obras da Mariña, pero a min encántame o proxecto".
Un dos obxectivos é que San Andrés recupere o atractivo comercial que tivo hai décadas. "Penso que rehabilitar esta zona vai ser unha boa cousa".
As obras van durar un ano. O proxecto conta cun presuposto de tres millóns de euros. En agosto está previsto activar unha nova fase, que aínda vai restrinxir máis o tráfico rodado.
