Como facer as maletas para aproveitar espazo e viaxar con menos peso
Como facer as maletas para aproveitar espazo e viaxar con menos peso
Facer a equipaxe para viaxar en avión require máis esforzo e organización
Chega a temporada de vacacións e para quen ten previsto viaxar preparar a maleta pode converterse nun pesadelo.
Cando se viaxa en avión é máis traballoso facer ben a equipaxe. Hai que axustar o espazo ao máximo. Iso si, tendo en conta destino e duración.
"Ata dous ou tres días debería chegarnos cunha maletiña pequena ou cunha mochila. E ata sete días válenos cunha maleta de cabina", explica Paloma Pou (@simplesientabien).
Paloma é organizadora profesional. O seu primeiro consello é viaxar cunha maleta por persoa. E logo seleccionar que queremos levar.
"Temos que esquecer os por se cadra e imos reducir de todo o que separemos un terzo ou a metade. Seguro que así imos levar só o que precisamos e imos viaxar máis lixeiros. Tamén sería interesante levar posto o que máis ocupa e o que máis pesa", engade.
Seguidamente hai que colocar con orde todo no interior da maleta.
"O ideal é unha maleta de cabina ríxida que se poida dividir en dúas partes. Unha parte imos destinala á roupa - pantalóns, camisetas, roupa interior, calcetíns, traxes de baño...- E no outro lado poñeremos os accesorios -neceser, toalla, pareo, calzado...-".
Unha vez feita é o momento de dispoñerse, agora si, a gozar da viaxe.
