Compiten en Ourense por facer a mellor hamburguesa de Galicia

Mexillóns, chourizo crioulo ou flocos de millo... son cousas que nunca agardamos ver nunha hamburguesa. Pero o certo é que cada vez son máis variados os ingredientes, de máis calidade e máis mesturados. Porque así o demandan os clientes.

"A xente pode aceptar calquera hamburguesa nunha cadea americana, pero nós temos que facer outras cousas.", di o cociñeiro Enrique Tejada

"A todos nos gustan as hamburguesas. E agora somos máis esixentes dende o punto de vista cultural e gastronómico.", Diego Domínguez, outro dos competidores

Seis restaurantes participaron no primeiro torneo para escoller a mellor burguer galega.  O xurado ten unha elección difícil, xa que todas elas coidaron ao máximo cada ingrediente e cada paso da elaboración. E iso que traballaron contra o reloxo.

"A estética, a mestura de sabores, a capacidade para innovar... hai varios parámetros", explica Juan Carlos Cortés, do xurado

A carne de vacún segue a ser o principal reclamo da hamburguesa pero os consumidores atenden tamén aos prebes e acompañamentos e, sobre todo, ao tipo de pan e como está feito.

"O noso pan está feito con 'brioche' de pataca. A xente mira moito iso.", aclara Adrián Santalices, cociñeiro.

Durante a cerimonia de clausura de Xantar coñeceranse os gañadores deste e doutros concursos que tivo o evento.