Confusión cos datos do rexistro de viaxeiros, dos 42 agora son 13 os obrigatorios
Confusión cos datos do rexistro de viaxeiros, dos 42 agora son 13 os obrigatorios
Dos 42 datos que se pedían, agora so serán obrigatorios 13
O BOE publicará nos vindeiros días unha orde ministerial con novas instrucións
Pasaron 15 días dende que empezou a funcionar o novo rexistro de viaxeiros e aínda non está claro que datos hai que reunir. Dos 42 que figuran na plataforma do Ministerio do Interior agora parece ser que os obrigatorios son 13, só 2 máis dos que había antes da entrada en vigor do real decreto, o número de teléfono ou correo electrónico e o grao de parentesco no caso de viaxar con menores. Isto está provocando moito malestar e confusión nos sectores implicados.
"Confusos porque hai que dar unha normativa que sexa clara, o que non podemos ter é o sector bailando, primeiro é unha cousa, despois outra", comenta Lalo Crespo, director do hotel Oca Puerta del Camino.
"Antes pedían o dos datos bancarios, pago con tarxeta, pago en efectivo, creo que agora xa non os piden, que non é obrigatorio, por iso che digo que hai confusión, porque para min no meu sistema de xestión séguennos pedindo obrigatorios", apunta Adriana Martínez, recepcionista e administrativa de Hello Rentacar.
"Tanto os programas de xestión como as persoas para a formación, como a xente que ten que reunir eses datos, como a información que temos que pedirlles aos clientes ten que ser clara, porque estamos falando de cousas que son moi sensibles", continúa Lalo.
Nas axencias de viaxes agora teñen que especificar os datos do hotel onde os clientes se van aloxar, cousa que antes non era necesario. Polo demais, xa tiñan unha recollida de datos moi exhaustiva, polo que o novo rexistro non lles afectou tanto.
"O único innovador que nós temos que especificar é o parentesco dentro das persoas que viaxan, cando hai menores", explica Rosa Cereijo, directora de Nautalia Viaxes, en Santiago.
Nos vindeiros días o BOE vai publicar unha orde ministerial aclaratoria.
"Que nos digan dunha vez o que necesitan, e nós colaboramos co que faga falta evidentemente, pero, claro, que nolo digan de verdade, porque para o cliente tamén é unha situación, no mostrador, intensa", conclúe Adriana.
