Continúa a busca do septuaxenario desaparecido en Mazaricos
Continúa a busca do septuaxenario desaparecido en Mazaricos
O seu coche foi localizado o sábado estacionado nunha rúa de Carballo
En Mazaricos continúa a busca de Antonio Tuñas, o veciño desaparecido hai unha semana. O seu coche apareceu o sábado en Carballo e a Policía Xudicial da Garda Civil está a analizalo en busca de probas que poidan despexar algunha das incógnitas desta desaparición.
Fai unha semana da desaparición de Antonio Tuñas Vieites e a súa familia continúa rastrexando a pé e en coches os lugares máis próximos a onde foi visto por última vez e onde o situaba o sinal do seu teléfono móbil e da pulseira de teleasistencia.
O sábado, o seu coche, no que saíra desde a súa casa de Alborés, foi localizado aparcado nunha rúa de Carballo, próxima á estación de autobuses. Pero o estado en que apareceu levantou as sospeitas de que Antonio non o conducira ata alí.
A Policía Xudicial da Garda Civil acudiu este mércores ao seu domicilio para recoller algúns útiles de Antonio que permitan contrastar mostras do seu ADN co que puideran atopar no vehículo.
