Cosmética natural feita con mel de Galicia
Cosmética natural feita con mel de Galicia
A Agrupación Apícola de Galicia presenta en Barcelona a súa liña Belacolmea
O mel favorece a hidratación, a elasticidade e a recuperación da pel.
Avalada polas investigacións da Universidade de Vigo, a Agrupación Apícola de Galicia acaba de presentar a súa liña cosmética nun congreso internacional de Barcelona. Os estudos realizados con sesenta voluntarios demostran que o mel, combinado cos aceites esenciais, funciona como hidratante natural e que favorece a elasticidade á pel.
Esther Ordóñez, veterinaria da Agrupación Apícola de Galicia: "Probáronse en idades novas e xente maior. Tamén detectamos que van moi ben para a xente con alerxias, psoríase... porque recuperan moi ben a pel".
E non só o mel. Tamén aproveitan a cera e a própole.
"Por exemplo, temos o xabón, que leva própole, que é boa para o acné", explica Esther.
Un novo nicho de mercado co que pretenden ampliar as opcións dos apicultores, ameazados por múltiples inimigos, desde o cambio climático á avespa asiática ou a varroa.
Eva Seijo Muras, Bióloga e apicultora: "Para nós, que ás veces temos problemas coa produción, é un complemento, cousas novas que ofrecerlles aos clientes".
Teñen oito produtos diferentes, desde bálsamos labiais e xabóns ou cremas corporais.
