Cultivos experimentais en Narón de variedades de trigo para a elaboración de pan galego

Nun cultivo experimental atopamos as últimas variedades de trigo do país certificadas polo Centro de Investigacións Agrarias de Mabegondo para elaborar pan galego: as variedades castrexo e arzúa.

"Unha característica fundamental do trigo do país con respecto ás variedades comerciais é o talle alto. Esta é unha vantaxe desde o punto de vista ergonómico porque permite que o trigo compita contra as malas herbas e poidamos reducir a achega de agroquímicos", explica Fernando Almeida, enxeñeiro agrónomo de Sementares.

O pan certificado como galego debe conter mínimo un 25 % de fariña do país. O resto pode ser trigo foráneo, que lle achega forza, do que aquí hai sementadas diversas variedades. "O trigo do país o que lle achega é extensibilidade que facilita o amasado", apunta Fernando Almeida.

Para coñecer as posibilidades que estas sementes abren para a fabricación de pan desprazáronse ata Narón profesionais tanto de Galicia como de Madrid ou Barcelona que traballan con fariñas galegas.

"As panaderías hoxe poderían distinguirse máis con trigos producidos en Galicia porque os solos de aquí e o clima de aquí lles está dando outros matices", sinala José Antonio López, agricultor encargado do cultivo experimental. Para Bruno Ribeiro, xerente de O Muíño de Cuíña: "Amais do trigo, o máis importante e dar co agricultor. É primordial contar cun agricultor que fai un cultivo rotativo".   

O Consello Regulador do Pan Galego confía en que este proxecto contribúa a impulsar a Indicación Xeográfica Protexida.

"Con estas variedades podemos aumentar a porcentaxe de fariñas do país, que é moi positivo, porque lle dá un sabor máis intenso ao pan galego e, ao mesmo tempo, abrirlle algo máis as portas á agricultura, que tamén é importante". 

O seguinte paso será coñecer os resultados dos estudos en laboratorio.