Dúas persoas escalan pola Torre de San Sadurniño, en Cambados

Dúas persoas escalan pola Torre de San Sadurniño, un dos maiores tesouros do patrimonio de Cambados, segundo se pode ver nun vídeo publicado nas redes sociais.

Non é un feito illado, as condutas incívicas deste tipo son cada vez máis comúns. Na Asociación para a defensa do patrimonio cultural galego cren que isto se debe, fundamentalmente, a unha razón.

"Penso que son as redes sociais, tanto desde o punto de vista da imitación como da satisfacción que producen eses cinco minutos de gloria nas redes sociais", di Javier Montero, vicepresidente da Asociación para a Defensa do Patrimonio Cultural Galego

Este tipo de condutas aumenta polo efecto chamada, aínda que, polo xeral, os cidadáns rexeitan os ataques contra o patrimonio.

Desde a Asociación para a Defensa do Patrimonio Cultural Galego din que se poden tomar medidas disuasorias, pero pensan que a solución é complicada.

"O que podemos facer é seguir traballando polo respecto e por valorizar o patrimonio e que a xente comprenda que é unha cousa irreversible. É un problema moitísimo máis complexo do que é poñer un cartel de prohibido subir",  advirte o vicepresidente da Asociación para a Defensa do Patrimonio Cultural Galego.

As imaxes deste ataque ao patrimonio en Cambados saen á luz pouco despois de que se viralizara o vídeo dun home escalando polas esculturas da Porta Santa da Catedral de Santiago e de que se rexistraran outras accións deste tipo na zona monumental compostelá, como pintadas, merendas o mesmo a instalación dunta tenda de campaña na praza do Obradoiro.