O fillo do actor Rodolfo Sancho, detido en Tailandia polo asasinato dun colombiano

O español Daniel Sancho Bronchalo, fillo do actor Rodolfo Sancho, está a ser investigado como sospeitoso do asasinato dun cirurxán colombiano na illa de Koh Phangan, no sur de Tailandia, segundo informou a EFE a policía tailandesa.

Sancho, de 29 anos, estaba a ser interrogado desde o venres pola policía tailandesa, que asegura que confesou o crime e que revelou que matou e desmembrou o colombiano Edwin Arrieta Arteaga, de 44 anos, por "celos" e temor a que "o enganase".

O nome do suposto autor do crime que revelou a policía coincide co do fillo do actor Rodolfo Sancho, neto á súa vez do tamén actor Sancho Gracia, do mesmo xeito que as fotografías facilitadas polas autoridades tailandesas.

EFE tentou sen éxito poñerse en contacto co representante do actor, coñecido polo seu traballo en series de televisión como Mar de plástico, El Ministerio del tiempo ou Amar en tiempos revueltos.

A embaixada española en Tailandia está en contacto directo co pai do sospeitoso, segundo fontes próximas ao caso. Algunhas fontes aseguran que o pai de Daniel xa viaxou a Tailandia.

Sancho atopábase baixo vixilancia policial desde o venres, despois de que el mesmo denunciara a noite do xoves nunha comisaría de Kho Phangan a desaparición do seu amigo, quen supostamente chegou un día antes á illa.

O visado de Sancho foi revogado e espérase que se presenten probas na súa contra ante un xuíz para que ordene a súa detención, algo que podería ocorrer nas próximas horas.

Con toda probabilidade, o sospeitoso será trasladado á veciña illa de Samui, onde unha vez acusado formalmente por un xuíz ingresaría en prisión.

Segundo afirmaron a EFE as fontes policiais, o mozo acompañou este sábado a policía aos sitios en que supostamente lanzou distintas partes do corpo desmembrado do colombiano, entre eles o mar. Un recolector de lixo descubriu o mesmo xoves unha pelve seccionada e intestinos humanos escondidos nunha bolsa de fertilizantes lanzada a unha entulleira da turística illa, o que propiciou que a policía comezara  a investigar un posible asasinato.

Durante unha nova procura no mesmo vertedoiro o venres, localizaron máis restos humanos, entre eles unha bolsa que tiña dúas  partes de extremidades inferiores, xunto a unha camiseta e uns pantalóns curtos, apuntan medios locais.

A policía tailandesa asegura que agora busca o resto de membros, especialmente a cabeza. Tras estes descubrimentos, a policía decidira este venres interrogar como sospeitoso ao español, tamén por mor de decatarse de que este mostraba cortes e rabuñaduras no seu corpo cando foi á comisaría para denunciar a desaparición.

Así mesmo, a policía dixo que o español foi captado polas cámaras de seguridade comprando a principios de semana coitelos, unha serra e bolsas de lixo, e que rexistraran o seu aloxamento na illa situada no golfo de Tailandia e coñecida polas súas festas de lúa chea.

As festas de lúa chea, que congregan milleiros de mozos de todo o mundo, tiveron lugar a pasada semana nunha das praias da illa. Segundo o diario Bangkok Post, que cita fontes da investigación, os dous homes quedaran en viaxar e verse en Koh Phangan, onde a suposta vítima reservara un cuarto nun hotel do 31 de xullo ao 3 de agosto.

Sancho, que declarou que foi recoller o seu amigo a un peirao en Koh Phangan arredor das 15 horas do mércores e que pasaron o día xuntos, asegurou á policía que o seu amigo desapareceu despois da medianoite dese mesmo día.

Imaxes de cámaras de seguridade da illa recollidas por medios locais mostran os dous nunha motocicleta o 2 de agosto. O venres, o sospeitoso publicou unha historia na súa conta de Instagram na praia xunto ao hotel Anantara, un dos máis exclusivos da illa.