Sancho di que a morte de Arrieta foi accidental e que se sentiu "arrepentido e culpable"

O xuízo que se celebra en Tailandia contra Daniel Sancho pola morte do médico colombiano Edwin Arrieta entrou na súa fase decisiva coa declaración do mozo español. Sancho respondeu nesta sesión ás preguntas da súa defensa e mantivo que a morte de Arrieta foi accidental.

Durante o seu testemuño dixo que se sentiu "arrepentido e culpable" tras a pelexa que, segundo a súa versión, causou a morte ao cirurxián colombiano, e tras ver o estado no que quedou Arrieta logo da liorta entre ambos na habitación de hotel de Sancho en Phangan, que provocou, segundo o acusado, que a vítima convulsionara tras golpearse a cabeza contra o lavabo.

A preguntas da súa defensa, o mozo español dixo que o médico colombiano quixo abusar del, deulle un empurrón e na caída bateu co lavabo

A declaración de Daniel Sancho diante do tribunal da illa de Samui comezou ás 11 da mañá, hora local, ás 8 en Galicia, e prolongouse durante case cinco horas.

"Era algo que non tiña intención de que ocorrese"

Como o xuízo é a porta pechada, pouco transcendeu do declarado polo mozo español, acusado en Tailandia de asasinar e desmembrar o médico colombiano Edwin Arrieta.

"Desde logo, (Daniel) mostrou o seu arrepentimento (ante o tribunal) porque era algo que non tiña intención de que ocorrese. Pero ante o sucedido e tras a presentación do grave cargo contra el (o asasinato premeditado) tivo que defenderse", dixo ás portas do tribunal o avogado de Sancho, Apichart Srinual.

Sancho, de 29 anos, reiterou nas preguntas realizadas polo seu avogado que a morte de Arrieta produciuse debido a unha pelexa en defensa propia despois de que o cirurxián colombiano tentase "violalo" e o ameazase a el e á súa familia.

A declaración de Sancho, rodeada dunha alta expectación mediática, foi en liña coa súa declaracións desde novembro, cando na fase preliminar do xuízo declarouse non culpable de planear a morte de Arrieta e sostivo que foi un accidente.

O español, realizou hoxe, alternando entre o español e o inglés e con tradución ao tailandés, un relato dos seus movementos desde que chegou a Tailandia o 30 de xullo, as súas primeiras horas en Phangan, a noite da morte de Arrieta e a súa posterior detención.

Pola súa banda, o avogado da coacusación, Mettapon Suwancarer, que representa a familia de Arrieta, afirmou que "nun momento dado, Daniel expresou hoxe o seu arrepentimento", aínda que indicou que o fixo de forma "breve".

"Hoxe escoitamos os feitos de boca de Daniel. Detallou os acontecementos desde antes de entrar en Tailandia ata despois de que se producise a morte, incluído o desmembramento do corpo e o abandono das partes en diversos lugares", engadiu o letrado, que representa á familia de Arrieta.

O avogado dixo que os detalles sobre se foi en defensa propia ou un acto premeditado serán examinados mañá pola fiscalía e a coacusación, que interrogarán a Sancho.

Aínda que inicialmente confesou o crime ante a Policía de Phangan, Sancho declarouse despois non culpable e durante a primeira vista do xuízo, o pasado 9 de abril, só aceptou o cargo de ocultación do cadáver, polo desmembramento de Arrieta.

O español declarouse non culpable dos outros dous cargos na súa contra, o de asasinato premeditado, que Tailandia castiga ata coa pena de morte, e o de destrución de documentación allea.

Na sesión do mércores será interrogado pola Fiscalía e as acusacións

A declaración de Sancho continuará este mércores respondendo á Fiscalía e á coacusación que exerce a familia Arrieta.

As acusacións manteñen que o suposto crime foi premeditado e preguntarán a Sancho por que, se a morte de Edwin foi accidental, non avisou inmediatamente a policía.

Antes que o mozo español, o tribunal escoitou o testemuño de tres policías da veciña illa de Phangan, escenario do suposto crime.

O pai de Daniel, o actor Rodolfo Sancho, non declarará no xuízo, ao renunciar a defensa ao seu testemuño.