Denuncian "grave colapso" no CHUS, con decenas de pacientes en corredores durante horas

A Asociación de Pacientes e Usuarios do Hospital Clínico Universitario de Santiago (CHUS) denunciou o “grave colapso” do servizo de urxencias con decenas de pacientes nos corredores durante horas.

Nun comunicado, exemplifican a situación coa xornada vivida este martes en que, a primeira hora da tarde, 32 pacientes graves permaneceron, en padiolas e cadeiras de rodas, esperando para ser atendidos.

Ao mesmo tempo, 34 pacientes co ingreso asinado ocupaban as zonas de traballo e atención en espera de que se lles asignase unha cama en planta.

Segundo explica o colectivo, a situación mesmo se agravou co paso das horas.

Respecto diso, a plataforma remarca que cando un “paciente grave é colocado nos corredores de acceso, non só se está producindo un agravamento da súa situación de saúde, senón que se está vulnerando ademais a súa esfera íntima, conculcando o dereito constitucional á dignidade e intimidade”.

Polo tanto, a asociación de pacientes advirte os responsables sanitarios que “non cabe xustificar esta situación baixo a consideración de que hai un aumento da demanda de atención non prevista e puntual”, xa que os problemas estacionais respiratorios e de gripe se reiteran todos os anos nestas datas.

Entenden que, polo tanto, a Consellería de Sanidade debería activar os plans de continxencia necesarios mediante a dotación de máis persoal no propio servizo de urxencias e en planta.

Reprochan así que, mentres a situación de colapso no centro hospitalarios é evidente, mantéñense “centos de camas pechadas por falta de persoal de enfermería e de facultativos”.

Esta situación evidencia, segundo a asociación de pacientes, unha “incapacidade manifesta” por parte da xerencia para afrontar os problemas de atención do servizo de urxencias e “que os inhabilita para seguir á fronte desta área sanitaria”.