Cedeira espera os resultados da última analítica da auga polo gromo de gastroenterite

Cedeira está á espera dos resultados da última analítica da auga para intentar identificar a orixe dun gromo de gastroenterite. Os casos non só foron detectados na vila, senón tamén noutras parroquias.

Desde o concello desaconsellan o consumo de auga da billa por mor dun gromo de gastroenterite. Aínda que a orixe non está identificada polo momento, activouse o protocolo específico e preventivo. Por este motivo, estase a repartir auga nunha cisterna.

A alarma saltou na tarde do pasado xoves, tras a detección dun gromo de gastroenterite entre a poboación. E, malia que a orixe aínda non está identificada, activouse un protocolo de prudencia e seguridade.

Hai quen fai caso omiso, pois as analíticas realizadas pola empresa xestora na auga de consumo humano cumpren con todos os controis de calidade e, ata a data, en ningún deles se detectou parámetro ningún que estivese fóra de rango.

Agora, en Cedeira están á espera dos resultados da última mostra, que deberán chegar, ao máis tardar, este martes.