Desartellada unha 'narcocasa' no barrio ourensán das Eiroás
Desartellada unha 'narcocasa' no barrio ourensán das Eiroás
Os veciños vivían con medo dende hai máis dun mes
A policía detivo os seus responsables, pendentes de pasar a disposición xudicial
No barrio ourensán de Eiroás os veciños agardan recuperar pouco a pouco a tranquilidade que meses atrás alterara unha narcocasa. Un punto de venda de droga que segundo os veciños estaba funcionando dende o mes de decembro.
Din que dende entón vivían con medo pola cantidade de toxicómanos que frecuentaban a vivenda.
A tranquilidade chegou onte ao mediodía cando varias patrullas da policía desartellaron este punto de droga e detiveron dous presuntos traficantes. Así e todo, o medo ás represalias segue presente na zona.
Unha patrulla da Policía Nacional presentouse este mércores no lugar para comprobar os precintos e para facerse cargo dun cadeliño que quedara abandonado na casa. O animal foi acollido temporalmente por unha protectora. Se ninguén o reclama será dado en adopción.
Os dous detidos permanecen arrestados en dependencias policiais á espera de pasaren a disposición xudicial.
