Tres detidos en Galicia ao desartellar unha rede de venda de coches roubados
Tres detidos en Galicia ao desartellar unha rede de venda de coches roubados
Un dos arrestados é o dono dun taller de Pontevedra e outros dous foron detidos na provincia de Ourense
A rede alugaba coches de alta gama en Portugal e falsificaba a súa documentación para vendelos en Galicia
O delegado do Goberno fai un chamamento á tranquilidade dos compradores destes coches e di que os informarán cando remate a investigación
Polo menos vinte persoas foron detidas no transcurso dunha operación policial contra unha rede criminal organizada dedicada á compravenda ilegal de coches de alta gama.
Un dos arrestados é un mozo dono dun taller de coches de Pontevedra. Outras dúas persoas foron detidas noutras localidades de Ourense e dezasete foron detidos en Portugal.
Os axentes rexistraron a vivenda do pontevedrés implicado na rede e tamén o taller de coches que rexenta na avenida de Montecelo e que quedou precintado.
Entre outras actuacións, os integrantes deste operativo policial comprobaron a documentación de todos os coches que estaban á venda neste concesionario.
En total houbo 8 rexistros en Pontevedra, Verín e Ourense.
Segundo fontes da investigación, os investigados adquirían mediante renting ou alugueiro automóbiles en Portugal e logo non os devolvían. Despois vendíanos en Galicia de maneira ilegal tras manipular, entre outras cousas, a súa documentación e os seus números de bastidor para ocultar a súa orixe.
O delegado do Goberno en Galicia fixo un chamamento á tranquilidade dos compradores destes coches, que os adquirían de boa fe e sen saber que eran roubados, asegurándolles que recibirán a información correspondente cando finalice a investigación.
Nesta operación policial participan efectivos da Unidade de Droga e Crime Organizado (Udyco) e do Grupo de Resposta Especial para o Crime Organizado (Greco) da Policía Nacional, co apoio de axentes da Policía Local de Pontevedra.
Axentes da Policía Judiciaria portuguesa e da Europol están a colaborar na operación contra esta organización criminal que, ademais de en Portugal, poderían actuar tamén noutros países europeos.
