Deteñen dúas persoas en Ourense por roubar e ameazar un home cunha arma branca

A Policía Nacional informou este xoves da detención, na madrugada do día 2 de novembro, dun home e unha muller como supostos autores dun delito de roubo con violencia e intimidación.

Segundo relatou a vítima á policía, no momento do suceso ía camiñando cara ao seu vehículo, estacionado no barrio da Milagrosa, cando dun coche próximo saíron un home e unha muller, que interromperon a súa marcha e, mostrando unha arma branca un deles, esixíronlle que lles dese os obxectos de valor que levaba.

Nese instante botou a correr. Foi alcanzado por un dos agresores detidos e os dous caeron ao chan. Tras un forcexo, conseguiu librarse refuxiándose no interior dunha cafetería para solicitar presenza policial.

Decontado dúas patrullas da Brigada de Seguridade Cidadá acudiron á chamada. Os axentes, tras as indicacións da vítima, localizaron a parella no interior do vehículo do que saíran.

Tras ser detidos como presuntos autores dun delito de roubo con violencia e intimidación, os policías recuperaron a carteira da vítima con toda a documentación ao seu nome e o diñeiro en efectivo.

Durante o rexistro tamén atoparon a arma branca supostamente empregada no atraco. Unha vez realizadas todas as xestións e dilixencias correspondentes, os detidos foron postos á disposición xudicial.